აშშ-ის ერთ-ერთმა ტექნოლოგიურმა კომპანიამ, Astronomer-მა, დროებით ჩამოაშორა თავისი აღმასრულებელი დირექტორი თანამდებობიდან, მას შემდეგ რაც Coldplay-ის კონცერტზე გადაღებულმა კადრებმა – სადაც სავარაუდოდ კომპანიის ორი თანამშრომელი წყვილივით ჩახუტებული ჩნდება – ინტერნეტში ვირუსულად გავრცელდა.
აღნიშნული ვიდეო თავდაპირველად ბოსტონში გამართულ კონცერტზე გიგანტური ეკრანზე გამოჩნდა. მასში ჩანს, როგორ არიან ერთმანეთზე ხელჩახუტებული მამაკაცი და ქალი. როგორც კი მათი სახეები ათასობით მაყურებელმა დაინახა, წყვილმა მყისიერად თავი დახარა და თავიდან ასარიდებლად კამერას დაემალა.
ქსელში დაიწყო საუბრები იმაზე, რომ ორივე ადამიანი კომპანია Astronomer-ის აღმასრულებელი რგოლის წევრები არიან და გავრცელდა ჭორები მათი ურთიერთობის შესახებ — რასაც ბენდის ლიდერის, კრის მარტინის ციტატამაც შეუწყო ხელი. პარასკევს გვიან კომპანიამ სოციალურ ქსელ X-ზე დაადასტურა, რომ აღმასრულებელი დირექტორი ენდი ბაირონი დროებით ჩამოშორდა უფლებამოსილებას.
ვიდეოში ჩანს, როგორ ირწევიან წყვილი მუსიკის ხმაზე და შემდეგ უცებ ცდილობენ მიმალვას. ჩანაწერი ინტერნეტში სწრაფად გავრცელდა ოთხშაბათს გამართული კონცერტის შემდეგ.
კრის მარტინმა, Coldplay-ის სოლისტმა, როცა დაინახა, როგორ იმალებიან წყვილი, დამსწრეებს მიმართა: „ან რომანი აქვთ, ან უბრალოდ ძალიან მორცხვები არიან“.
ვიდეო TikTok-ზე თავდაპირველად მილიონობით ადამიანს მოხვდა თვალში, შემდეგ გავრცელდა სხვა პლატფორმებზე, იქცა მიმებად და სატელევიზიო გადაცემებში განხილვის ობიექტიც გახდა.
ორი დღის შემდეგ, რაც ინტერნეტი აჭრელდა ამ ჩახუტების კადრებზე საუბრით, Astronomer-მა გამოაცხადა, რომ შიდა გამოძიება დაიწყო, თუმცა კონკრეტულ ვიდეოზე არაფერი თქვა.
“Astronomer ერთგულია იმ ღირებულებებისა და კორპორატიული კულტურის, რაც კომპანიის დაარსების დღიდან გვამოძრავებს,” — ნათქვამია განცხადებაში. “ჩვენი ლიდერები ვალდებული არიან, რომ მაგალითი მისცენ სხვებს როგორც ქცევაში, ასევე პასუხისმგებლობის განცდით. სამეთვალყურეო საბჭომ ოფიციალური გამოძიება დაიწყო და მალე დამატებითი დეტალებიც გახდება ცნობილი.”
კომპანიის თანადამფუძნებელი და პროდუქტის ხელმძღვანელი პიტ დიჯოი დროებით CEO-ად დაინიშნა.
რამდენიმე წყაროს მიხედვით, სავარაუდოდ, ვიდეოში ჩანს სწორედ CEO ენდი ბაირონი, რომელიც კომპანიას 2023 წლის ივლისიდან ხელმძღვანელობს. თავად ბაირონმა იდენტობა ვიდეოში არ დაადასტურა.
ქალს, რომელიც ვიდეოში ჩანს, სოციალური ქსელების მომხმარებლებმა ქრისთინ კაბოტად ამოიცნეს — ის კომპანიის Chief People Officer-ია და შემოუერთდა Astronomer-ს 2024 წლის ნოემბერში. მანაც არ გაუკეთებია კომენტარი ვიდეოსთან დაკავშირებით.
BBC-ს დამოუკიდებლად არ დაუდასტურებია ვიდეოში გამოსახული პირების ვინაობა.
კომპანიის ოფიციალურ განცხადებაში ასევე აღნიშნულია, რომ ბაირონს პირადი განცხადება არ გაუვრცელებია და მის სახელით გავრცელებული ინფორმაციები არასწორია. კომპანიამ დაამატა, რომ ვიდეოში სხვა თანამშრომლები არ ჩნდებიან.
პარალელურად, სოციალურ ქსელებში ვრცელდებოდა მოგონილი ციტატები ბაირონის სახელით.
